پاکستان نے اقوام متحدہ کی تخفیفِ اسلحہ کانفرنس کی صدارت سنبھال لی
پاکستان نے جنیوا میں اقوام متحدہ کی تخفیفِ اسلحہ کانفرنس (سی ڈی) کی صدارت سنبھال لی، جہاں پاکستان کی نمائندگی کرتے ہوئے سفیر طاہر حسین اندرابی کانفرنس کے اجلاسوں کی صدارت کریں گے۔
دفتر خارجہ کے مطابق پاکستان کی جانب سے کانفرنس کی صدارت سنبھالنا ایک اہم مرحلے پر ہوا ہے اور یہ عالمی برادری کے پاکستان کی سفارتی قیادت اور کثیرالجہتی اسلحہ کنٹرول و تخفیفِ اسلحہ سفارت کاری میں اس کے تعمیری کردار پر اعتماد کا عکاس ہے۔
کانفرنس اور اس سے قبل کام کرنے والے اداروں نے حیاتیاتی ہتھیاروں کے کنونشن، کیمیائی ہتھیاروں کے کنونشن اور جامع جوہری تجربات پر پابندی کے معاہدے سمیت کئی اہم بین الاقوامی سلامتی کے معاہدوں پر مذاکرات کیے ہیں۔
سفیر اندرابی، جو وزارتِ خارجہ میں ایڈیشنل سیکریٹری برائے اسلحہ کنٹرول و تخفیفِ اسلحہ اور ترجمانِ دفتر خارجہ بھی ہیں، سفیر نے 2026 کے اجلاس کے لیے کانفرنس کے سابق صدور کے ایک اجلاس کی صدارت کی اور علاقائی گروپوں کے نمائندوں سے مشاورت کی۔
پاکستان 2026 کے سی ڈی اجلاس کی آخری صدارتی باری پر فائز ہے اور سال کے اختتام تک کانفرنس کی کارروائی مکمل کرانے کی نگرانی کرے گا۔ اپنی مدتِ صدارت کے دوران پاکستان کانفرنس کی سالانہ رپورٹ اور اقوام متحدہ کی جنرل اسمبلی کی فرسٹ کمیٹی میں اس سے متعلق قرارداد پر مذاکرات کی قیادت کرے گا۔
تخفیفِ اسلحہ کانفرنس کے ایجنڈے میں جوہری ہتھیاروں کی دوڑ کا خاتمہ، جوہری جنگ کی روک تھام اور بیرونی خلا کو ہتھیاروں کی دوڑ سے محفوظ رکھنے جیسے اہم امور شامل ہیں۔
تخفیفِ اسلحہ کانفرنس دنیا کا واحد کثیرالجہتی فورم ہے جہاں تخفیفِ اسلحہ اور اسلحہ کنٹرول سے متعلق معاہدوں پر مذاکرات کیے جاتے ہیں۔ اقوام متحدہ کے جنیوا دفتر میں قائم اس کانفرنس کے 65 رکن ممالک ہیں، جن میں تمام جوہری ہتھیار رکھنے والی ریاستیں بھی شامل ہیں۔
